陳鍵鋒加拿大機場被捕獲網民嚇親：他怎麼胖成這樣了

显示全部楼层 · 发表于娱乐 2023-6-2 00:45:04

現年45歲嘅陳鍵鋒（Sammul）當年憑身材高大及斯文靚仔造型，風靡萬千少女，更被封為「少女殺手」。陳鍵鋒喺2010年約滿離開TVB後曾轉戰內地市場及轉行做潛水教練，不過近年佢已經淡出娛樂圈，甚少公開露面及分享近況。最近有網民喺加拿大多倫多機場偶遇陳鍵鋒，不過佢嘅身型及面形明顯發脹咗唔少，變咗油膩大叔，青靚白淨形象不再。

最近有網民喺加拿大多倫多機場偶遇陳鍵鋒，並將相片上載到小紅書，相中嘅陳鍵鋒染上一頭金髮，著上黑色衫及灰色褲，自己一個人坐喺機場貴賓室，耷低頭玩緊電話，身型及面形明顯發脹咗唔少，似乎留意唔到有人影佢相。相片曝光後，唔少網民都留言話佢發福咗唔少，例如「陳鍵鋒............當年這麼帥」、「像個老頭」、「天啊，當初明明是最帥的那個」、「怎麼會這樣，也就40出頭的年齡啊」、「陳鍵鋒一個大帥哥怎麼變成這樣了」、「像陳鍵鋒，但希望不是他。以前衝上雲霄裏最喜歡他」、「唏噓不已當年真的好靚仔」、「啊？？？他怎麼胖成這樣了！！！」、「我簡直不敢相信這是陳鍵鋒」、「油膩大叔」及「omg,佢變成咁樣」等等。
陳鍵鋒喺1996年參加全能DJ大募集成為新城電台DJ，1997年加入TVB成為旗下藝員，正式展開演藝生涯，並成為力捧上位小生之一，多年嚟佢都有唔少經典角色，例如《律政新人王》Vincent、《學警雄心》李柏翹及《少年四大名捕》追命等等。不過之後佢嘅工作量一直減少，而佢喺約滿TVB後北上發展，憑俊俏外表加上不俗嘅演技，獲得唔少演出機會，仲差唔多套套都係做男一，當中《美人心計》、《亂世佳人》及《封神英雄榜》令佢人氣急升，吸引咗唔少內地女粉絲。
2018年佢喺泰國做身體檢查時，意外發現個腦少咗條主要血管，之後佢返香港搵專科診斷，證實佢患咗一種冇辦法根治嘅遺傳病。當時佢受到好大打擊，仲曾有輕生念頭。佢喺得到家人嘅鼓勵下重新振作，暫時退居幕後並轉跑道低調做潛水教練，不過2021年因牽涉學員喺西貢學潛水溺斃，而令佢再次銷聲匿迹。早排，由佢及郭雪芙主演嘅網絡電影《新包青天之冰魄》喺內地上映，其實呢部電影喺2019年已經煞科，喺戲中陳鍵鋒飾演包拯，需要拋開偶像包袱，增肥20磅兼曬黑，不過唔少網民都話佢顏值大跌Watt。