賀梁朝偉得獎重播新紮師兄

显示全部楼层 · 发表于影视情报咨讯 2023-9-12 21:43:02

早前梁朝偉獲威尼斯影展頒發終身成就獎，TVB相信有見及此，安排由9月13日開始深夜重播偉仔初出茅蘆時主演嘅劇集《新紮師兄》，俾影迷欣賞影帝的那些年。

《新》係1984年TVB台慶劇，當時TVB收視幾近壟斷，而以幾位上位小生花旦主演又夠吸引力，當時據報每集平均收視超過50點，即係差唔多大半個香港都睇緊。故事以80年代香港少年警校為背景，原因係當年少年警校收生不足，於是警隊邀請TVB合作，並由當時得令嘅監製招振強操刀。結果劇集播出後效果超出預期，報考警隊人數大幅增加。由於劇集受歡迎，TVB喺1985及1988年分別開拍2齣《新紮師兄》續集，甚至傳過90年代想搵梁朝偉回巢拍第4輯。後來由於偉仔檔期問題而未能成事，而該劇藍本經改造後，成為另一齣重頭劇《天地男兒》。
80年代TVB係造星搖籃，《新紮師兄》嘅男女主角梁朝偉、張曼玉、劉嘉玲同劉青雲，多年後分別成為影帝影后，由此可見一斑。劇集安排梁朝偉同張曼玉係一對，而劉嘉玲係偉仔同父異母細妹，最後嫁俾劉青雲；而多年後梁朝偉同張曼玉成為螢幕經典情侶，偉仔就同嘉玲成為夫妻，劉青雲亦從後趕上成為實力派影帝。