41歲「御用丫鬟」陳思齊出席好友婚宴童顏依然

显示全部楼层 · 发表于影视情报咨讯 2023-9-25 19:16:29

有「御用丫鬟」之稱嘅陳思齊（原名：陳凱怡）離開TVB多年，轉行做音樂治療及香薰按摩師，久未露面嘅佢近日出席落選港姐好友梁麗瑩（Davily）嘅婚宴，雖然已經踏入41 歲，但依然保養得宜。

陳思齊喺社交網站上載梁麗瑩婚宴嘅相片，並留言話：「感謝妳的邀請，有幸見證妳既幸福時刻，又可以借個機會見見啲舊朋友，愛你喲～睇下我滿載而歸，就知一對新人花左幾多心思，同大家感情有幾好，姊妹的愛有多狠，嚮全名出去搶花球。我唔尷尬。我唔尷尬。我唔尷尬。有些事與我無緣，你們就別替我急喇！其他合照去晒邊呀！」當日佢穿藍白色連身裙、戴上圓框眼鏡出席婚宴，睇落依然童顏，保養得宜！
陳思齊喺2000年參加香港小姐競選，當時被傳媒睇高一線，更被封為「翻版朱玲玲」，可惜佢最後因為「朱玲玲係邊個？」一句令佢大熱倒灶。陳思齊加入TVB後，拍攝電過唔少電視劇集，例如《皆大歡喜》、《公主嫁到》、《律政新人王》及《巨輪》等等，可惜拍咗13年都星運平平，由於佢弱質纖纖，又有俾人一種楚楚可憐嘅感覺，所以佢大多數都係做丫鬟角色，因此有「御用丫鬟」之稱。去到2013年，佢轉投香港電視曾參演劇集《大眾情性》，之後香港電視不獲發牌，最終選擇退出娛樂圈轉行做香薰按摩生意。去到上年，佢驚喜出山拍攝ViuTV劇集《冥冥之中》飾演人口控制公司職員，雖然戲份唔算多，不過仍然被網民一眼認出。
陳思齊多年嚟喺演藝事業上未算突出，不過喺2013年曾傳出佢整容，令佢備受關注。當年指佢整容失敗，原來佢係擔任美容院代言人，打咗兩針透明質酸針，搞到面容變膠及鼻子變形，完全無晒當年脫俗嘅氣質，好彩透明質酸會被皮膚吸收及分解，而家個樣先可以變返正常。