王子涵父女檔直播帶貨王晶用開戲擔正利誘網紅幫囡囡增粉

显示全部楼层 · 发表于每日闲聊 2023-4-28 19:34:18

現年33歲嘅導演王晶愛女王子涵（Dada），喺2007年參與爸爸嘅電影《七擒七縱七色狼》後入行，多年嚟拍過唔少電影及劇集，不過可惜都未能令佢大紅大紫。近年佢就跟住爸爸北上發展，日前仲同爸爸拍住上，齊齊現身內地網紅嘅直播帶貨。王晶為咗囡囡嘅事業發展，不惜以開戲做男主角利誘網紅，成功令愛女抖音粉絲一夜激增20萬。

王子涵於倫敦藝術大學化妝及髮型形象設計系畢業，加入娛樂圈後，參與電影《甜心粉絲王》、《功夫點心》及《黑勢力》等拍攝工作。除咗拍電影之外，佢喺15年加入無綫，參與唔少綜藝節目及劇集拍攝，當中佢喺爸爸有份投資嘅劇集《荷里活有個大老千》擔任女主角「缽仔糕」，有不俗嘅表現，獲得唔少觀眾讚賞。其後，佢仲成功加入高收視處境劇《愛·回家之開心速遞》，飾演秘書蔡玉皎（皎皎），不過外間反應麻麻，而佢亦喺上年被調離劇組。
近年王子涵跟住爸爸北上發展，不過由於佢嘅知名度唔高，所以日前就孖住爸爸現身內地網紅小楊嘅直播帶貨。王子涵一出場就大讚爸爸同好多香港巨星好熟，之後王晶就出場。為咗囡囡嘅事業發展，王晶就以開戲做男主角利誘網紅，仲話如果囡囡個抖音賬戶有5萬人追蹤，佢就會開戲畀佢做男二；如果抖音賬戶有10萬人追蹤嘅話，仲開戲畀佢做男一，仲可以任揀女主角。而呢位網紅就表現得非常興奮，除咗叫網民幫幫手之外，仲諗埋戲名叫《猛男小楊之龍蝦拳》，結果王子涵嘅抖音粉絲一夜激增20萬。